susa | literatur emailuak | literaturaren zubitegia | euskarari ekarriak | armiarma | klasikoak | aldizkarien gordailua | basquepoetry | ipuina.eus | ganbila.eus

« Hitz egiten duen poesia | Poesiaren adikzioa »

Arrainak ura baino / Hasier Etxeberria / Elkarlanean, 1999

Maitasunagatik Javier Rojo / El Correo, 2000-02-23

Hasier Etxeberriak maitasunezko istorio bitxia kontatzen digu Arrainak ura baino izeneko eleberrian. Izan ere, hasieran ezusteko planteamendu batekin egiten du topo irakurleak: narratzaileak, ginekologo ospetsu batek, kontatuko digu zeintzuk izan diren Madrileko Burtsa Etxean burutu duen sarraskiaren arrazoiak. Kanpotik ikusita, badirudi buru normal batean ezin dela sartu halako pertsonaia batek, bizitzan irabazletzat hartu ohi diren horietako batek, halako ekintza burutu izana eta berak eman duen arrazoia (bere emaztearen maitasunagatik egin duela) sinestezina zaie guztiei. Bi osagai hauek, amodioa eta sarraskia, nola dauden lotuta azalduko digu narratzaileak nobelan zehar egiten duen aitorpenean. Idazleak erabiltzen dituen amarru batzuen bidez (nabarmenena, narratzaileak informazioa izkutatuz eta emanez egiten duen ekilibrista-lana) irakurlearen interesa istorio osoan zehar mantentzen da piztuta. Tragikomediatzat har daiteke eleberria, baina askotan ez da oso argi gelditzen non dagoen bi elementu horien arteko muga. Eta hain zuzen ere, mugak ez zehazte hau dateke kontakizunaren alde interesgarrienetako bat. Honen adibide bat, protagonistak burutu duen sarraskiaren aurrean erakusten duen indiferentzia morala.