susa | literatur emailuak | literaturaren zubitegia | euskarari ekarriak | armiarma | klasikoak | aldizkarien gordailua | basquepoetry | ipuina.eus | ganbila.eus

« Gordintasunaren samurra | Nigan bizi dadin »

Korte bat, mesedez / Goizalde Landabaso / Alberdania, 2000

Kazetarien kontuak Javier Rojo / El Correo, 2000-06-07

Goizalde Landabasok Euskadi Irratian lan egiten duen kazetaria da eta, bere esperientzian oinarrituta, lana euskaraz burutu behar duten kazetarien gorabehera bitxiak, ia eskizofrenikoak, kontatzen ditu Korte bat, mesedez izeneko istorio bilduman. Umore mikatz puntu bat duten istorioak dira, askotan txistearen mugan daudenak, baina erdaldunek euskal mundua zeinen gutxi ezagutzen duten erakusten dutenak. Errealitateak aurpegi asko dauzka baina, eta bat bakarra aurkezteak egoera sinplifikatu ez ezik faltseatu ere egin dezake askotan. Eta ezin dugu hori ahaztu liburu hau irakurtzean. Izan ere, kazetarien munduan euskaraz eta erdaraz aritzen direnen elkarbizitza korapilatsua erakusteko, egoeraren azaletik igarotzea lortzen ez duten istorioak kontatzen ditu idazleak. Adierazpenak euskaraz lortu behar dituen kazetariaren ikuspuntua aurkezten dute, eta egoera hizkuntzaren arazo hutsera mugatzen da: badirudi kazetariari bost axola zaiola jaso behar den informazioa; nahi duen bakarra euskaraz egotea da, irratian eman ahal izateko moduan. Azkenean irakurleak ez daki nork ematen dion pena handiagoa: horrelako egoeran lan egin behar duten kazetariek ala besteen hitzen xurgatzaile baino ez diruditen kazetari banpiro horien biktimek.