susa | literatur emailuak | literaturaren zubitegia | euskarari ekarriak | armiarma | klasikoak | aldizkarien gordailua | basquepoetry | ipuina.eus | ganbila.eus

« Fikzioak kale | Munduaren ikuspegia »

Kontu-jaten / Arantxa Iturbe / Alberdania, 2006

Kontu-jaten M. Egimendi / Aizu!, 2007-07

Belarriak tente, kontu-jaten ibili da idazlea liburu hau osatzeko. Pentsatzen jarri eta harritu egiten da irakurlea, idazleak elkarrizketatutako emakumeei egindako galderak, hain sinpleak izanda (txikitako ametsak, lagunak, maiteminak…), ziur aski geure ama edota amonei inoiz egin ez dizkiegulako, ametsak, lagunak eta maiteminak gure belaunaldiarentzat sortutako kontuak balira bezala.

Alde batetik, beraz, bizipen pertsonalak dira liburukoak, baina, bestetik, emakume anonimoen testigantzek XX. mendeko bizimodua ezagutzeko aukera ere ematen dute, adibidez, gerra zibilak umeengan izan zuen eragina, nahiz eta gai hori oso gainetik pasatu. Izan ere, ez da hori liburuaren helburua, garai hartako emakumeen bizimodua ezagutzea baizik. Hala, era guztietako protagonistak hartu ditu idazleak: baserriko bizimodu latza pairatutakoak eta mediku izatera iritsitakoak, neskamearekin hazitakoak eta neskame ibilitakoak…

Bestalde, liburuaren egitura ere bitxia da, oso dinamikoa, emakumeen bizitzako pasarteak bi ikuspuntu ezberdinetatik ikusteko parada ematen baitigu. Kontakizun baten ondoren, emakumeak aipatutako beste pertsonaia baten “erantzuna” agertzen da beti, gehienetan gutun itxurakoa, hasierako kontakizunari beste ñabardura bat eransten diona. Kontakizun batzuk tristeak dira, eta beste batzuek irribarrea eragiten dute (horrelakoa da bizitza), baina, finean, oso gustura irakurtzen dira guztiak.