susa | literatur emailuak | literaturaren zubitegia | euskarari ekarriak | armiarma | klasikoak | aldizkarien gordailua | basquepoetry | ipuina.eus | ganbila.eus

« Azoreetako postal zaharrak | Gernika »

Ergelen nonbrea / J.E. Urrutia / Pamiela, 2006

Estetizismoaren bideak Javier Rojo / El Correo, 2007-05-23

Jose Enrique Urrutia Capeau-k narrazio bilduma bat argitara eman du “Ergelen nonbrea” izenburupean. Bertan agertzen diren narrazioak bi zutabe hauek sostengatzen dituzte: exotismoarekiko zaletasunak eta muturreko estetizismoak. Dudarik gabe, loturik daude, biak ala biak planteamendu estetiko bakarraren ondorioak baitira. Narrazio hauetan idazleak balizko irakurlea aspaldiko garaietara eta urruneko lurraldeetara eraman nahi du, historian eta geografian zehar txango ibiltzeko gonbiteak baitira istorioak. Eguneroko errealitateak narraziorako gai duina eskainiko ez balu bezala, halako gaiak bilatzen dira mundu exotikoetan. Eta gaiaren aldetik aurki dezakegun exotismo hau erraz lotzen da idazkera estetizistarekin. Idazkera honek XVII. mendeko euskal klasikoak gogoratzen ditu, baina narrazio diskurtsoaren barneko arrazoiei erreparatuz gero, ez dago justifikatuta, justifikazio hori diskurtsotik kanpokoa baita, ideia estetikoen alorrekoa. Izan ere ematen du idazleak Flauberten Sallammbô nobelaren ildotik doalarik, modernismoa berpiztu nahi izan duela. Baina Flauberti gertatu zitzaion bezala, narrazioetan dekoratu ikusgarria gehiegi nabarmentzen da.