susa | literatur emailuak | literaturaren zubitegia | euskarari ekarriak | armiarma | klasikoak | aldizkarien gordailua | basquepoetry | ipuina.eus | ganbila.eus

« Obsesioak | Zorrotza »

Gure ametsen gerizan / Luigi Anselmi / Pamiela, 2000

Poesiara bueltatuz Javier Rojo / El Correo, 2001-02-21

Azken urteotan bazterrean utzitako ibilbideari ostera ere ekin dio Luigi Anselmik poema liburu berri hau, “Gure ametsen gerizan”, idaztean. Orrialde horietan erabiltzen dituen irudiek klasiko bihurtu den tradizio poetiko batera garamatzate zuzen: hondakinen presentziak, denborak sortutako higadurak, galdutakoaren aurrean sentitzen den nostalgiak (benetan zer galdu den ez badakigu ere) euskal poesian egokitu den giro kaletarra, erromantiko berantiarra eta etsitua ere defini litekeena, islatzen dute.

Deuseztapen marko honen barruan gelditzen den jarrera etsipenarena da eta, etsipen honetan, bizitza hau jasangarriago bihur dezaketen elementuak goraipatzen dira, ahanzdura moduak, adibidez. Baina poesiak, orokorrean ikusita, kontraesan handi batean murgilduta dagoela ematen du. Alde batetik, poesiak esan lezakeen guztia dagoeneko esan du eta dirudi, poema berriak ezinezkoak diren puntu batera heldu bagina bezala. Bestaldetik, zaila da Luigi Anselmi bezalako poetek esan nahi dutena beste era batez esanda irudikatzea. Gauzak honela, poema berriak behin eta berriro sortzen dira, poema zaharretan esandakoaren behin eta berriroko berridazketa batean. Poesia idaztea bera giza-kondizioaren metafora bihurtu baita ia.