« Saiatu eta asmatu | Historiaren erraietan »

Enpleguaren arbola / Pablo Sastre / Susa, 2006

Lanaren kateak Javier Rojo / El Correo, 2006-12-20

Pablo Sastreren azken nobelak “Enpleguaren arbola” du izena. Bertan kontatzen du zer nolako ibilbidetik pasatu behar duten erreintsertzio laboraleko plan batean sartzen diren pertsonaia batzuek, agintzen zaien saria, lana alegia, eskuratzeko. Marjinatuen artean marjinatuak, existentzia ofizialik ez duten inmigrante ilegalak, soldata sozialetik bizi diren gizartetik kanporatuak dira langileak izateko helburuarekin plan horretan sartzen direnak. Horretarako garbiketa enpresa batean formazio ikastaroa egin behar dute. Baina saritzat eskaintzen zaiena mendebaldeko aberastasunaren kondarrak baino ez dira, miserian bizirauteko aukera, esklaboa izateko forma sofistikatu berria, nolabait esateko, eta hala ere pozik egotea eskatzen zaie. Idazleak testua era estilizatu batean burutu du, sinbolismoz beteriko kontaeraren bidez. Lehenengo partean, nobela errusierazko izkribu batetik egindako transkripzioa izango balitz bezala aurkezten da, handik etorritako inmigrante baten ikuspuntua eskaintzen duelarik. Azken atalean, berriz, testua ahozko hizkeraren adibidea ere izan liteke, akatsak eta guzti. Egoera latza kontatzeko kontzesiorik gabeko literatura egiten du Pablo Sastrek.