« Une gozo baina txiki askoren batura | Zabaletik txokora »

Itsaso aurrean / Bingen Ametzaga / Susa, 2006

Olerkari jeltzalea Javier Rojo / El Correo, 2006-12-06

Bingen Ametzaga (1901-1969) gerra zibila baino lehenago idazten hasi zen idazleen belaunaldikoa dugu. Bere eskutik batez ere poemak sortu ziren, itzulpengintzan ere aritu zelarik. “Itsaso aurrean” izenburua duen liburu honetan bere testuen antologia eskaintzen zaigu, Xabier Irujoren edizioan. Hiru zatitan banatuta agertzen da: gerra aurreko poemak, gerra osteko deserri amerikarrean idatzitako poemak eta itzulpenak. Eta puntako idazletzat ezin hartu badezakegu ere, bere poesian garaiko poeta askorengan topiko bihurtzeraino errepikatu ziren osagai berak aurki ditzakegu. Hau da, halako poesiaren adibide ikusgarria da. Poemetan EAJren ildoko abertzaletasuna agertzen digu, naturalezaren eta erlijioaren aipamenak, guztiz topikoa dirudien sinbolismo sinple baterako joera. Guztia, inguru horretan hain maiz azaltzen zen ideia hau aipatzeko: euskal herria hilzorian dago etsaien erasopean, baina berpizkundearen itxaropenaren aurrean aurkitzen da. Gauzak honela, harrigarria da itzulpenen zerrenda. Shakespeare, Milton, Wilde, Whitman, Turgenev bezalako poeten lanak euskaratu zituen. Poeta moduan ohikoaren adibidea izan zen, baina itzultzaile aritu zenean, lan bikaina burutu zuen.