« Hitzen bitarteko irudia izaki literatura | Lau ipuintxo »

Inon izatekotan / Juan Luis Zabala / Susa, 2006

Idazlearen egunerokoa Javier Rojo / El Correo, 2006-09-06

Juan Luis Zabala bere egunerokoaren ateak ireki ditu “Inon izatekotan” izeneko liburu honetan, non azken hogei urteotan idatzitako hainbat eta hainbat testu aurkitzen diren. Narrazioak, poemak, iritziak, batzuk ezagunak, besteak orain arte argitaratu gabeak, biltzen dira eguneroko honetan, idazlearen bilakaeraren lekuko. Gai batzuk errekurrenteak dira. Idaztea bera, adibidez. Idazleak idazten duen neurrian aurkitzen du bere destinoa, era arranditsuan esateko; beraz, idazleak idazteaz idazten duenean, bere izaera zuritzen du bizitzea tokatu zaion mundu pragmatikoan. Eta idaztearekin batera, bakardadearen gaia ere jorratzen du, biak oso lotuta baitaude, idaztea bakardadean baizik ezin baitaiteke egin, eta bere kasuan, bakardadetik, idaztera bultzatzen duen akuila bakardadea bera baita. Biek ala biek elkar mantentzen dute. Gauzak honela, bere buruaz halako irudi erromantikoa ematen du, munduan oso ongi moldatzen ez den pertsonaiaren irudia. Baina, jakina, ezin dugu Pessoak behinola esandakoa ahaztu, idazleak bere burua publikoan aurkezten duenean, neurri handian fikziozko pertsonaia baita. Edonola ere, Zabalak beti eskaintzen dizkio gauza interesgarriak irakurleari.