susa | literatur emailuak | literaturaren zubitegia | euskarari ekarriak | armiarma | klasikoak | aldizkarien gordailua | basquepoetry | ipuina.eus | ganbila.eus

« Ostrukak jezten | Bekatuez »

Mundu txikia / Alberto Barandiaran / Susa, 2005

Mundu txikia M. Egimendi / Aizu!, 2006-01

Mundua zabala da, batzuentzat besteentzat baino gehiago, baina handia. Alberto Barandiaranek Mundu txikia izenekoan bildu dituen ipuinetako protagonisten mundua, aldiz, txikia da; irakurleari erakusten zaiona, behintzat, bai. Bilduma osatzen duten 14 ipuinetako protagonistak une edo leku zehatz batean harrapatzen ditu idazleak, eta irakurleak ez du gauza asko jakingo pertsonaiari buruz behin kontakizuna amaituta.

Idazleak protagonista momentu labur batez ezagutu eta gehiago ikusi beharko ez balu bezala, haren historia eta ingurua osatzea irakurleari utzi nahiko balio bezala. Batzuetan, izenburuagatik ez balitz, protagonistaren izena ere ez genuke jakingo.

Oso atsegina da ipuinon irakurketa. Istorio xumeak dira, edonori gerta dakizkionak, eta pertsonaiak ere bai. Ipuin batean ez bada, bestean ikusiko du irakurleak bere burua islatuta, edo bera ez bada, hurbilekoren bat. Idazkera ere xumea da, baina polita, irudiz hornitutako deskribapen eta konparazioz betea. Pello izeneko ipuinaren hasierako lerroaldea adibide: “Euri tantak, leihoan, zapaburuak dira, labur eta iheskorrak. Kolpe batez agertzen dira, burua loditzen zaie eta, gero, etsia hartzen dute, kristalean osatzen diren errekasto meharretatik desagertu arte, ezinegonak itota”. Eta irudikatzen jarrita, hala dira.