« Nola pintatu min infinitua? | Gainbehera »

Euskal Klasikoen atarian / Patxi Salaberri Muñoa / Pamiela, 2004

Hitzaurrez hitzaurre Javier Rojo / El Correo, 2005-02-16

Patxi Salaberri Muñoa lan eskergarria egiten ari da euskal literatura klasikoa (1900 urtea baino lehenagoko literatura, hauxe baita gure artean “klasiko” hitzarekin aipatu ohi dena) ezagutarazteko. Asmo honen azken emaitza “Euskal Klasikoen atarian” izenburua duen antologia hau dugu. Irizpide oso zehatza izan du hemengo hautaketa egiteko: liburu klasikoetan agertzen diren hitzaurreak, gomendiozko gutunak, eskaintzak eta honelako testuak, idazlanaren aurkezpena egiteko erabiltzen ziren testuak alegia, izan dira aukeratuak liburu honetarako.

Testuok ortografia gaurkotuta eta idazleari buruzko aurkezpentxo batez hornituta agertzen zaizkigu. Batzuk oso ezagunak dira (Etxepareren eta Axularren hitzaurreak), baina beste batzuk zokoratuago egon dira euskal literaturan.

Beti da interesgarria honelako bilduma bat hartzea. Batetik, idazleek erretorika nola erabiltzen zuten ezagutzeko aukera ematen du. Bestaldetik, idazleen asmoak, oinarriak eta, batzuetan, literaturari eta euskarari buruzko ideiak azaltzeko ere balio du. Mitxelenak beste honelako liburu batzuez behin esan zuen moduan, ez da espezialistentzat idatzia, baina espezialistei ere ez die kalterik egingo.