susa | literatur emailuak | literaturaren zubitegia | euskarari ekarriak | armiarma | klasikoak | aldizkarien gordailua | basquepoetry | ipuina.eus | ganbila.eus

« Sekulako aurkikuntza | Izuaren basoa »

Birika zatiak / Xabi Borda / Susa, 2004

Hutsuneak Javier Rojo / El Correo, 2005-01-19

Xabi Borda poeta gaztea da, 1981. urtean jaioa, eta liburu hau, “Birika zatiak” izenburuarekin agertu berri dena, haren lehen poema liburua. Azken bolada honetan behin eta berriro erasotzen gaituen errealismo bortitza alde batera utzita, ez da Bukowskiren imitazio absurdorik egiten saiatzen. Horren ordez, tradizioaren arabera poetikotzat hartzen diren osagaietara jo du poemak egiteko. Gauzak honela, naturalezari buruzko aipamenak, eguraldiaren eta urtaroen erreferentziak (batzuetan poetak sentitzen duenarekiko sintonian, bestetan kontrapuntuan), denboraren igarotzearen gaineko hausnarketak aurki ditzakegu hemen. Ohiko osagai poetiko hauek erabiltzeak alde onak eta txarrak ditu. Izan ere, osagai hauek liburuaren poetikotasuna bermatzen dute, baina, honen ordainean, poetikotasun hori topikoaren gainean bermatuta geratzen da. Planteamendu postromantikoak (era sinple batez adierazteko) nabarmentzen dira honelako poesian, bakardadearen esperientziatik abiatuta, poetak barnean sentitzen duen hutsune baten bete beharra azaltzen baita. Honez gainera, “ZU” idealizatu baten presentzia ere aurki dezakegu batzuetan. Honelako poesia egin beharreko urrastzat har daiteke, poetak bere ahots propioa bilatzen duen bitartean.