« Gure lastak laxatzeko istorio paregabea | Zientzia eta literatura »

Begi-ikarak / Felipe Juaristi / Erein, 2004

Giza kondizioa Javier Rojo / El Correo, 2005-01-05

Felipe Juaristik nobela, haur eta gazte literatura eta poesia txandakatu ohi ditu bere literatur jardunaldian. Honetan, poesiaren txanda izan da “Begi-ikarak” izeneko liburu honekin. Juaristiren poema hauen bidez ez zaizkigu sentimenduak adierazten, edota, zehazkiago esateko, sentimenduak ez ezik, bestelako gauzak ere eskaintzen zaizkigu, sentimenduen gainetik nabarmentzen direnak. Poema liburu honetan, ideiez hitz egiten zaigu, giza kondizioaren inguruan hausnarketa egiten den aldetik. Izan ere, badirudi idazleak gizakia definitzen duena zer den bilatu nahi duela. Gauzak honela, Juaristiren poesian gizakia itxaropenaren eta minaren arteko lehian murgilduta ikusten dugu. Poesia abstraktua da, oinarrizko metafora batzuen inguruan biltzen dena. Argia, airea, urdina dira horrelako osagai metaforikoak, eta gizakiak horietara heldu nahi luke. Baina gaua, bakardadea eta mina indartsuagoak izan eta, horren ondorioz, batzuen desirak eta besteen errealitateak osatzen dute gizakien mundua. Ezkor hitza egokia izan liteke poesia hau definitzeko. Idazlea momentu guztietan saiatzen da nitasunetik aldentzen, kontatzen dena esperientzia pertsonaletik haraindiago baitago, orotara heltzen den giza kondizio hura islatu nahian.