« Azken aleak, hasiera baten antzera | Disgrace »

Hamabost zauri / Karmele Jaio / Elkar, 2004

Bikoteak Javier Rojo / El Correo, 2004-12-08

Karmele Jaiok “Hamabost zauri” izenburuko narrazio liburua plazaratu du. Eta izenburuak iradokitzen duen moduan hamabost narrazio biltzen dira liburu honetan. Hamabost istorio desberdin, baina funtsean istorio bat eta bakarra kontatzen dutenak: gizon-emakumeen arteko bikote harremanak ezinezkoak direla. Izan ere, bikotea osatzen dute narrazio hauetako pertsonaia nagusi gehienek, baina bikote harreman horietan beti dago osagairen bat, bikotearen iraupena hausten duena. Zeloak, batzuetan; inkomunikazioa, ia beti; itxurakeria, behin baino gehiagotan. Honelakoak ikusten ditugu islatuta narrazio hauetan, harremana nola hausten den azaltzen zaigun bitartean. Alde honetatik liburua homogeneoa da. Pertsonaiek tragikoak izan nahi lukete, baina gehienetan funtsezkoena alde batera utzita ziztrinkeriekin bakarrik kezkatzen direnez, nahiko barregarriak gertatzen dira narrazio askotan. Idazleak komunikabideen munduan du lanbidea, eta honek, gertatu ohi den bezala, berehalako isla du bere idaztankera neutro samarrean. Narrazioren batean izan ezik, ez da lantzen idaztankera horretatik aldentzen den estilo berezirik. Liburu interesgarria bai, baina inpresioa uzten du euskal literaturan dagoeneko honelakoak maiz irakurri ditugula.