Ezinezko maletak / Juanjo Olasagarre / Susa, 2004

Identidadearen bila Javier Rojo / El Correo, 2004-07-21

Juanjo Olasagarrek poesiaren alorrean bide aipagarria urratu ondoren, nobelaren alorrari ekin nahi izan dio. Ibilbide berri honen lehen emaitzak “Ezinezko maletak” du izenburu. Lau lagunen bizitza da argumentuaren abiapuntua. Behinola oso lagunak izan ziren horiek bide desberdinetatik jo dute bizitzan eta elkarrengandik urrundu dira. Ingalaterran bizi da lagun horietako bat eta hau hiltzean erdi lurperatuta zuten iragana berpiztuko zaie. Izan ere, lagunaren hiletara doazela, sortuko dira tirabira eta azken hogei urteotan gertatu diren aldaketak eta kontraesanak azaleratuko zaizkie. Nobela honen argumentua lehia baten inguruan gauzaturik dago. Alde batetik, herrian (Nafarroako Lekunberrin) geratu direnak daude; bestetik, herritik joan direnak. Baina kontrajarpen honek harantzago daramatza bertan planteatzen diren tentsioak, zeren, azken finean, erroak gorde baina iraganean geratu direnek eta iragana alde batera utzita beste bat izanda bizitza berri bati ekin nahi diotenek osatzen baitituzte bi multzoak. Izan ere, hemen, funtsean, identidadeaz mintzo baitzaigu, identidadea talde barruan edo norberaren izaeran bilatzeaz, alegia. Eta hau azaltzeko oso nobela interesgarria eskaini digu Olasagarrek.