susa | literatur emailuak | literaturaren zubitegia | euskarari ekarriak | armiarma | klasikoak | aldizkarien gordailua | basquepoetry | ipuina.eus | ganbila.eus

« Bihotz ehortzia berpiztu zenekoa | Fikziozko ispiluak »

Ahots bilduma / Gonzalo Etxague / Alberdania, 2004

Zoroaren unibertsoa Javier Rojo / El Correo, 2004-04-21

Gonzalo Etxague euskal literaturaren munduan sartu berri da “Ahots bilduma” izeneko nobela laburrarekin. Idazle honekin beste izen bat gehitzen zaio 1970etik 1975era bitartean jaiotako euskal idazleen zerrenda oparoari. Nobela labur honetal Estepan izeneko pertsonaiak kontatzen digu lehenengo pertsonan bere bizitza. Baina pertsonaia honen ikuspuntua zeharo distortsionatuta dago, Etxe Zuria deitzen duen zoroetxean sartuta baitago, eskizofreniak sortzen dizkion eldarnioetan galduta. Buru barruan eraikitzen duen munduaren irudia eta irakurleak lausotuta antzematen duen errealitatea ez datoz bat, jakina, eta halako kontrajarpena lanabes ezin egokiagoa da ikuspuntuen erlatibismoa iradokitzeko. Istorioa, errealitate arrunteko logikan ulertu nahi duen irakurlearen ikuspuntutik airean bezala gauzatzen da, euskarri material handirik gabe. Idazle honek argitaratzen duen lehenengo liburua izateko, landua eta umotua dirudi, presaka argitaratu beharretik urrun. Alde honetatik, atal batzuk ia-ia antologikotzat har daitezke, istorioa, denboraren haria aldrebestuz, atzeraka kontatzen duen paragrafoan bezala. Eta mundua zoroetxe handia dela kontuan hartuta, irakurketa alegorikoa eta guzti izan dezake nobelak.