susa | literatur emailuak | literaturaren zubitegia | euskarari ekarriak | armiarma | klasikoak | aldizkarien gordailua | basquepoetry | ipuina.eus | ganbila.eus

« Literaturatik bizitzara | Nola hizkera aparta batetan gizarte rurala deskribitu »

Madame Edwarda / Begiaren istorioa / Hildakoa / Georges Bataille (Juan Inazio Garmendia) / Elkar, 1987

Georges Bataille Xabier Mendiguren / Argia, 1988-01-10

Literatur erotikoko sail berrian itzuli duten lehen liburua duzue hau, eta egileak merezi zuen ohore hori, ondo merezi ere: Georges Bataillek, Sade, Genet eta beste idazle madarikatu batzuei buruzko orrialde gogoangarriak idatzi zituen, eta baita berebiziko indarreko narrazio erotikoak, hala nola “Ma mère”, edo hementxe datorkigun “Histoire de l’oeil”.

Ezagutzen ez duenarentzat zera esan behar: Bataillek ez diola eskainiko agian berak uste zuena (esku bakarrez irakurtzeko liburua) baina askoz ere gehiago emango diola, zinez. Kontraesana dirudi baina ez: esan nahi dudana zera da, Bataillek ez duela erotismo friboloa praktikatzen; beretzat —Saderentzat bezalaxe— sexua zerbait sakratua da, nolabait ere, gauza guztien gainetik dagoena, heriotzarekiko mugan ia ia. Izan ere, Eros eta Thanatosen arteko harreman hau zaharra izan arren gizaldi bakoitzak, ausartzen den bakoitzak berdeskubritu ohi duen fenomenoa dugu.

Batailleren lanen beste ezaugarri batzuk: txixarekiko lilura, Ongi eta Gaizkiari buruzko usteen bortxa, sakrilegiorako joera bizia. Koito hutsaren zaleek ez lukete agian ulertuko, baina sexuaren amildegian begiratu nahi duzuenontzako gonbidapen bat duzue.

Goraipatzekoa halaber Juan Inazio Garmendiak Batailleren idazkera gordin eta aldi berean dotorea jasotzen egin duen ahalegina.