susa | literatur emailuak | literaturaren zubitegia | euskarari ekarriak | armiarma | klasikoak | aldizkarien gordailua | basquepoetry | ipuina.eus | ganbila.eus

« Gazte eta berde | Aurkia ifrentzu »

Izozmendiak / Juan Ramon Madariaga / Susa, 2003

Sakonera begira Javier Rojo / El Correo, 2003-11-26

Juan Ramon Madariaga euskal poesian aurki daitekeen izenik interesgarrienetakoa da. Aurten “Izozmendiak” izeneko poema liburua eskaini dio irakurleari. Madariagak orain arte egin izan duen poesia ezagutzen duen irakurlea berehala ohartuko da honetan bestelako bideak urratzen saiatu dela idazlea. Bere poesiaren ezaugarritzat eman izan den hizkuntza estetizismo (batzuetan modernismoa gogora ekartzen zuen hizkuntz estetizismo hura) alde batera utzi du poema hauetan. Eta nago aldaketa honekin heldutasun poetikoan aurrerapauso bat eman duela. Izan ere, poesia ez dute hitzek egiten, ideiek baizik; eta hitzak ideien euskarriak dira. Azaleko edertasuna gainditu eta ideien sakontasunean arakatu nahi izan du poema liburu honetan. Eta zer aurkitzen du irakurleak ibilbide honetan? Lehenengo eta behin, gizakiaren kondizioarekin egiten du topo. Bere izaeraz kontzientea den gizakiak badaki beraren eta inguruko munduaren artean kontrajarpen nabarmena dagoela, mundua pentsatzen duen neurrian mundu horrek eskuetatik ihes egingo balio bezala, denbora ezinbestez igarotzen delarik. Eta kontrajarpen honen ondorioz, bakardadearen sentimendua gailentzen da.