susa | literatur emailuak | literaturaren zubitegia | euskarari ekarriak | armiarma | klasikoak | aldizkarien gordailua | basquepoetry | ipuina.eus | ganbila.eus

« Hiru(ki) | Ez hiltzeko idazten da, maitasunaz »

Norberak maite duena / Miren Billelabeitia / Pamiela, 2022

Irakurriz bizi Paloma Rodriguez-Miñambres / El Diario Vasco, 2022-12-24

Argitaletxeek gero eta liburu gehiago ateratzen dituzte; alabaina, belaunaldi berriek gutxiago irakurtzen omen dute, eta horren ordez pantailak nahiago dituzte. Zalantza barik, aurpegi anitz ditu afera honek eta Miren Billalabeitiaren saiakera apur bat argitze aldera datorkigu.

Egileak modu atsegin eta baikorrean adierazten du ez dela egia gero eta gutxiago irakurtzen delako baieztapena. Aitzitik, gazteen aldeko aldarrikapena egiten du. Euskal literaturan aditua eta institutuko irakaslea izan denez, tertulia dialogikoak antolatu ditu urte askoan ikasleekin literatura unibertsaleko obren gainean solastatuz. Horrenbestez, haiekin partekatu dituen esperientzietan oinarritu da literaturaz eta irakurketaz hausnartzearren.

Saiakera honetan bi atal nagusi daude; lehenengoan, “Solasaldi literarioak” izenpean, autoreak aipatzen du ezin dela irakaskuntzarik ulertu irakurketarik gabe eta irakasteko ogibideak nolabaiteko sedukzio saioa dakarrela. Bigarrena, “Irakurleak eta gogoetak”, luzeagoa dugu, non Billelabeitiak aurkezten digun ikasleekin landutako obren ibilbidea, hala nola, Troiako emakumeak, Hamlet, Ithaka, Lili eta biok, Metamorfosia.

Gazteen ahotsa errespetatu beharraz hitz egiten digu, pixkanaka joango baitira liburuen mamian sakontzen. Taldeka euren eta besteen iritziak konpartitu bitartean, ikasleen bilakaeraren lekuko pribilegiatua izan da Billelabeitia: ulermenean aurrerapausoak egin dituzte eta, aldi berean, hizkuntzaren aberastasunaz jabetzen joan dira, tertulia horien bidez euskararen erabileran ere trebatuz.

Irakurtzeko jarduerak ematen duen gozamenaz dihardu Billelabeitiak, ez soilik aditu eta irakurzale gisa berau, baizik eta nerabeekin laguntzaile aritzeko tenorea izan duelako, zenbat ikasi duen haiengandik eta prozesuan eskuratu duen poztasuna helarazten digularik.