susa | literaturaren zubitegia | literatur emailuak | armiarma | klasikoak | aldizkarien gordailua | basquepoetry | euskarari ekarriak

« Atariak | Aurkikuntza bat »

Zertaz ari garen maitasunaz ari garenean / Raymond Carver (Koro Navarro) / Elkar / Alberdania, 2003

Carver-en istorioak Javier Rojo / El Correo, 2003-08-13

Raymond Carver gustuko duen euskal irakurleak zorioneko daude “Zertaz ari garen maitasunaz ari garenean” narrazio bilduma euskaraz agertu delako Koro Navarroren itzulpenean. Pertsonen arteko harremanen inguruan bildu ohi ditu narrazioak idazle amerikarrak, batez ere harreman horiek apurtzear dauden momentuan. Ia oharkabean, edozein erretorikari muzin eginez, eguneroko bizitzaren tragedia erakusten zaigu, eta egunerokoa izanik, edozein pertsona arrunti gertatzen zaionez, epikarik eta handitasunik gabeko tragedia da erakusten zaiguna. Izan ere, ez dago eguneroko bizitzaren tragedia hura leun dezakeen osagai heroikorik. Gauzak honela, pertsonaia bakartiak agertzen zaizkigu, bizitzak garaituak, eta pertsonaia hauek bakardadeari ihes egin nahi liokete, baina ez dakite zer egin behar duten hori lortzeko. Pertsonaia hauen lagun leial bakarrak edaria dirudi, beti edalontzi bat baitute eskueran, edaria bera bizitza hondatzen dien osagaietako bat izan arren. Raymond Carver-en idazkera soilak euskal idazle asko, batez ere gazteak, liluratu ditu, erretorika handiusteaz nekatuta. Izan ere, Carver funtsezko idazlea da, bazterrean geratu direnen istorioak inork baino hobeto kontatzen baitaki.