susa | literatur emailuak | literaturaren zubitegia | euskarari ekarriak | armiarma | klasikoak | aldizkarien gordailua | basquepoetry | ipuina.eus | ganbila.eus

« Aztarnak | Postariaren bigarren deiaren zain »

Hamar urte barru / Joxe Belmonte / Erein, 2003

Patuak lotutakoa Javier Rojo / El Correo, 2003-07-23

Erein argitaletxeak antolatutako nobela sariaren irabazlea izan da Joxe Belmonteren “Hamar urte barru” izeneko kontakizun hau. Abiapuntu konbentzionala du: 1973.ean lau gaztek egin duten txango batean argazki bat atera eta handik hamar urtera berriro elkartzekotan geratu dira. Jakina, irakurlea gazte hauek berriro elkartzearen zain geratuko da, beste hainbatetan ikusi izan den bezala. Nobelak, ordea, ohiko espektatiba horiek hausten ditu; pertsonaia hauek nork bere bidetik joko baitu eta elkarren arrastoa galduko baitute.

Edonola ere, zuzen zein zeharka, beraiek konturatu gabe ere, patu horrek era ironiko batez lortuko du azkenean, nahi ez bezala, emandako hitza bete dezaten. Pertsonaien ibilbideak kontatzen zaizkigun bitartean, 70ko hamarkadako azken urteak eta 80ko lehenengoak pasatuko zaizkigu begien aurretik, Bilbo gertakarien kokagunea delarik, iraganeko mamuek lokamuts batean bere bizitokia aurkitu balute bezala. Dudarik gabe, nobela interesgarri baten aurrean gaude, non istorioaz gain kontamoldeak ere atentzioa ematen baitu. Izan ere, ikuspuntu desberdinen presentziak eta narratzaile bitxiaren ahots inpresionistak ere liburu honen balioa azpimarratzen dute.