Beldurra bera zaldi / Bixente Serrano Izko / Paniela, 2002

Askatasunaren jatorria Javier Rojo / El Correo, 2003-07-09

Bixente Serrano Izkok askatasunaren oinarriak azaldu nahi ditu, izenburua “Beldurra bera zaldi” duen saiakera labur honetan. Liburuan agertzen den oinarrizko tesia askatasunaren abiapuntuan beldurra dagoela da. Izan ere, gizakiek arriskuetatik ihes egitean sortzen da askatasuna Serrano Izkoren planteamenduan. Hau da, beldurrak sortzen omen du askatasuna. Edonola ere, filosofo askoren izenak eta ideiak aipatu eta jorratu ondoren, Nietzscheren ideietatik hurbil gelditzen da egilea, askatasunaren funtsean borondatea dagoela adieraztean. Liburuan zehar, kontraesankorra dirudien planteamendu hau (askatasunaren oinarrian beldurra eta borondatea daudelakoa) koherentea dela azaltzen saiatzen da. Gauza batzuk, ordea, argitu gabe gelditzen dira, idazleak berak zenbait momentutan adierazten duenez. Lehenengoa, nire ustez nabarmenena, Askatasuna (singularrean eta letra larriz idatzia) eta askatasunak (pluralean idatzia) ez direla inoiz ere bereizten, eta arlo filosofiko-existentzialetik politiko-sozialera pasatzen dela ia oharkabean. Bestea, askatasunaren subjektuen arteko lehia ia ez dela aipatu ere egiten. Izan ere, liburu honen helburua ez da zein den askatasunaren muga azaltzea, baizik eta zein den bere jatorria.