susa | literatur emailuak | literaturaren zubitegia | euskarari ekarriak | armiarma | klasikoak | aldizkarien gordailua | basquepoetry | ipuina.eus | ganbila.eus

« Atzerrian | Urtaroak eta zeinuak »

Disoluzio agiriak / Jose Luis Otamendi / Susa, 2019

Disoluzio agiriak Jon Mirena San Pedro / Prest, 2020-05

Gaur egungo hitzen peskizan diharduela diosku Jose Luis Otamendik, gaur egun behar ditugun eleak zein diren ez dakiela. Eta hitzez eskas ibiltzeko ez da makala Disoluzio agiriak eleberrian egiten digun eskaintza.

Genesiaren kontrakarrean “Jainkorik gabeko zazpi eguneko disoluzioa” proposatzen digu, 7 ataletan 39 olerki liburu-perla honetantxe barnebilduz. Irakurleak erritmo luzeagoko poesia molde berri batean aurkituko du poeta, amore eman gabe bere baitako geografian barrena tematsu.

Disoluzioa, beraz. Deseraiketa. Nitasunetik idatzita, gu-a xedetzat harturik, poeta den tankerakoa agertzen zaigu, zorrotz, eskuzabal. Adina bere bidea jorratzen ari dela jakitun, gorputza du bere jardunaren abiapuntu, politikarako ardatza; zaurgarri, ahul, azaltzeko ahalke izan gabe. Era berean, galeraren maluraz mintzo zaigu, herri gisa pairatutakoaz, etxeko kuttunen zaintza, geroko doluaz, bere-berezkoa duen dotoreziaz poesiari emana. Olerki batzuei domaia badarie ere, inork ez dezala lerro arteko ezein derrotaren aztarnarik txerkatu. Umorea, ironia fina badira liburuan isuriak. Catalunya, Galiza bihotzean. Kapitalari egurre, marxismoa lagun.

Poema ederrak, nork bere gustukoak… Zorionaren kontra; Aldaketak datoz mundura; Lekuak hustu; Murmurioen jauregia; Txatalak Mary Wollstonescraft Shelleyrentzat; Maiatza Seamus Heaneyrekin…

Disoluzioa. Beste aukera baterako sormena jalgiz. Bibelarran letz… “kausa eder bat berriro biluz eta gazte”. Galdera-markarik gabeko Otamendiren goi-mailako poesia.