« Aro beltzaren neurriko | Erroen desira »

Ipuin batean bezala / Joan Mari Irigoien / Elkar, 2002

Maitasun mugagabea Javier Rojo / El Correo, 2003-04-02

Joan Mari Irigoienek amodiozko nobela bat idatzi nahi izan du “Ipuin batean bezala” izenburupean argitaratu den liburu honetan. Sentimenduz betetako istorio bat da, beraz, nobela honetan irakurleari eskaintzen zaiona. Istorio honetako protagonistek erabateko maitasun istorio bat bizi dute, eta haien arteko amodioa hain erabatekoa denez, maitasunaz gain tragedia ere agertzen da nobelan, maitasun hark edozein muga, edozein zorigaitz gainditzeko ahalmena duela erakutsi nahi balu bezala.

Baina hain maitasun handia, hainbeste zorigaitz pasatzen duten pertsonaia hauen arteko harreman berezia, kontu handiz kontatu behar da, honelako istorio bat edozein momentutan barregarri suertatzeko mugan baitago, sentimenduak sentiberakeria bihurtuta. Izan ere, halako maitasuna karikaturatik hurbilegi egoten da nobela osoan zehar. Nago idazleak, sentimendu mugagabeak kontatu nahirik, kontamoldean gorde behar ziren mugak ere gainditu dituela. Bestaldetik, Irigoienen literaturan ohikoa denez, pertsonaiek ideia batzuen errepresentazio estilizatuak ematen dute, txotxongilo-teatroko pertsonaiak izango balira bezala, idazlearen asmoak plazaratzeko tresna egokiak. Sentimendu onak baino gehiago behar da nobela bat gauzatzeko.