« Iraganaren arrastoan oraina auzian | Hitzen dimentsioa »

Malkoen Mintzoa (Arantxa Urretabizkaia eta eleberrigintza) / Iratxe Gutierrez / Utriusque Vasconiae, 2002

Nobelari buruz Javier Rojo / El Correo, 2003-03-12

Iratxe Gutierrez ikerlari gazteak Arantxa Urretabizkaiaren nobelen azterketa bat eskaintzen du “Malkoen mintzoa. Arantxa Urretabizkaia eta eleberrigintza” izeneko liburu honetan. Lehenengo eta behin, balizko irakurleari gauza batez ohartarazi behar zaio: liburua esparru akademikoan koka daiteke, beraz, literaturari buruzko ikerketa bat da, neurri handi batean irakurle aditua eskatzen duena. Izan ere, bere iritziak azaltzeko Iratxe Gutierrez narratologiaren oinarri sendoetatik abiatu da. Alde honetatik, liburua baliagarria izan daiteke Arantxa Urretabizkaiaren nobelagintza ez ezik narratologiari buruzko ikuspegi orokorra eta zehatza ere izateko. Alderdi teoriko hau nabarmentzen da lehenengo orrialdetik, zeren narratologiaren kontzeptuak azaldu ahala aztertzen baitira Urretabizkaiaren nobelak. Baina, alderdi teorikoa nabarmendu arren, nobelen azterketa da ikerketaren azken helburua.

Urretabizkaiaren nobelagintza dela eta, Iratxe Gutierrezen ikerketan bilakaera argi bat azaltzen da: kontamoldea nabarmentzen den literatura mota batetik, istorioa nagusi den literaturara igaro da idazlea hogei urteko eta hiru nobelako ibilbidean, bere izaeraz kontzientea den idazketa baten bidez.