susa | literatur emailuak | literaturaren zubitegia | euskarari ekarriak | armiarma | klasikoak | aldizkarien gordailua | basquepoetry | ipuina.eus | ganbila.eus

« Hegoalde exotikoa | Amapolaz estalitako landa »

Errua eta maitasuna / Markos Zapiain / Elkar, 2002

Errua eta maitasuna Jon Benito / Gara, 2002-11-15

Markos Zapiainen hitzaldia izan zen aurtengo Galeuzcako unerik ederrenetakoa. Itzulpengintza itzulera dela, atzera itzulera, berrirakurketa, ondorioztatu genuen ponentzia adituta.

Ahul samar dabil gure kritika. Liburu bat ez da ona kanpoko sari batek laudatzen duenean bakarrik. Ez nuke zehazten jakingo zein den literatur (edo musika, edo arte, edo antzerki…) kritikaren papera, baina ez dut dudarik ahul dabilela badiot. Liburu hau oxigeno bonbona bat da itotzen ari direnentzat. “Errua eta maitasuna” izena du liburuak. Ziur asko, tituluko “errua” egileak aipatu eta gaitzat hartzen dituen liburuez egindako irakurketa pertsonala da. Irakurketa pertsonala diot, hartzaileak irakurritako liburuei birpasa kritikoa planteatzen baitu, irakurri gabeko liburuetara gonbita eginez. Erreferentziak eta aipamenak ez dira doakoak kasu honetan, ez dira karaktere betezale. Maitasuna, berriz, literaturarekiko duen detailea da. Ez da liburuen larruketa akademikorik hemen. Literatura eskola irakatsitako sinalefa, erritmo eta errima bilketa, testu suntsiketa baino gehiago da. Literatura komunikazioa da, hartzailearekin jolas egitea. Komunikatu nahi dena baina, ez da mezu bakar bat, ez da mezu uniforme bat. Horixe erakusten digu Markosek. Guk liburu horietatik jaso ez dugun beste zerbait ikusten du Markosek testu horietan. Eta irakurketa, hausnarketa hori konpartitzea da liburu honen azertu nagusia. Liburu hau oxigeno bonbona bat da merkatuak arreta gutxi eskaini dien liburuentzat. Merkatuak mespretxatzen dituen generoentzat. Liburu hau irakurle onei, gaiztoei, interesatuei bideratuta dago.