susa | literaturaren zubitegia | literatur emailuak | armiarma | klasikoak | aldizkarien gordailua | basquepoetry | euskarari ekarriak

« Hondartzetatik | Errua eta maitasuna »

Galtzontziloak autobusean zintzilik / Aritz Gorrotxategi / Erein, 2002

Hegoalde exotikoa Javier Rojo / El Correo, 2002-11-13

Bidaia liburuaren eta ohiturazko kronikaren erdibidean ikusten dut “Galtzontziloak autobusean zintzilik”, Aritz Gorrotxategiren nobela. Abiapuntua oso sinplea da, eta baten bati hurbila irudituko zaio: ikasketen amaiera ospatzeko (eta, bide batez, “estudiante tunante” bizitzari behar bezala adio egiteko) mutil batzuek erabaki dute Tunezera astebeteko bidaia egitea. Bidaia noski, ez da erromantikoek lurralde ezezagunen eta esperientzia berrien bila egiten zituztenak bezalakoa.

Mutil hauek hegoaldera parranda bila doazen iparraldeko turistak dira: izan ere, edozein hegoaldetan agertzen da iparralde batetik etorritako “Giri” bat. “Giri” izan eta bertoko salbaia izan, erlatiboa da, noski. Mutil hauek, beraz, hegoaldera doaz eta hegoalde horretan zenbait abentura barregarri gertatzen zaizkie. Bidaia honekin euskaldunen ohitura berezi batzuk agertzeko eta hauen lepotik piska bat barre egiteko aukera aprobetxatzen du idazleak. Eta gertakari barregarrien ondoan, hizkuntzan bertan ere bilatzen du idazleak umorezko tonu hori, batez ere ingelesezko izenen eta esalditxoen transkripzio fonetiko bitxien bidez (“Britni Espirs”, adibidez). Literaturan denbora pasa dibertigarri baten bila dabilenak liburu honetan aurki dezake non ase bere gogoa.