susa | literatur emailuak | literaturaren zubitegia | euskarari ekarriak | armiarma | klasikoak | aldizkarien gordailua | basquepoetry | ipuina.eus | ganbila.eus

« Batasun eta zatiketen artean | Ez gara geure baitakoak »

Ez gara gure baitakoak / Joseba Sarrionandia / Pamiela, 1990

Bi egile dituen liburua A. Moreno / Egin, 1990-01-23

Bakandu egiten dira Pamiela etxeak argitaratzen dituen liburuak. Egin egiten duenean, berriz, ikusgarriak egiten ditu. Hemen dago, esaten baterako Ez gara gure baitakoak titulua dakarren hau.

Liburu honen egileak bi dira ene iritzian, zeren testugilearen lana ona bada, ez da makalagoa marrazkilariarena.

Ez dut uste,ondo, artez edo zuzen ulertu zuenik baten batek Sarrionandiaren aitorpen hura, berak bihotz bi zituela zioenekoa. Paradoxa da bai, bihotz bi izatea. Hare paradoxa itzelagoa hamaika bihotz izatea. Hitz jokoa ematen duen antibihotza ere paradoxa dateke. Bizitza bera paradoxaz josita dagoela esatea baino zuzenagoa da, beharbada, bizitza bera ez dela besterik, paradoxak jostea baino. Joslearen haria dialektika da ezizenez hurrean.

Hala ekialdeko tradizioan nola gurean, paradoxaren gainean eraiki da hamaikatxo ipuin. Joseba Sarrionandiak tradizio biak jokatzen ditu orain Kung-Fu ikusten egoten garenoi irensgarri berria ekartzeko.

Ez daude Tao-tik urrun hemengo batzu. Guztien artean osatzen duten sareak halako arraina arrapa gura du, bizitza bera.

J. E. Urrutia, Kapok ere bere sarea josi du, paradoxa hari meheaz, umorez —ohi duen bezala— eta kipulak azalak baino interpretaziorako bideak ugariagoak dituzten irudiak eta argazkiak ekarriz.

Irudigilearen lana izkiriatzailearen zereginaren osagarria izan bada ere —eurek jakin behar zelan egin duten lan— autonomia dute hemengo marrazkiek.