« Zubiaren begia | Gaueko kontakizunak »

Tiroa kontzertuaren erdian / Belen Gopegui (Ainhoa Caballero) / Txalaparta, 2011

Boz katalogoa Juan Ramon Makuso / El Diario Vasco, 2011-07-26

Badakigu subjektua errealitate baten aurrean bizi dela, eta errealitate horren aurrean, norberak hartzen du bere erantzukizuna, edozein delarik zelai jokoa. Baina hau gizakiarentzat badirudi zaila dela onartzea. Belen Gopeguik bere Tiroa kontzertuaren erdian, literaturak, eta bereziki eleberrigintzak nola islatzen duen errealitatea, egileak bere aurrean duen esperientzia, ekintza enpirikoa, aztertzen du. Eta noski bere ikuspegia ematen digu, bestela nola izan! Horretarako Stendhal idazle frantziarraren gogoeta bat hartzen du eta baita ere beste hainbat egileen lanak, hala nola Coetzee eta Philip Roth. Esan daiteke liburu honetan jorratzen den gaia nagusia, eta beraz Gopeguiren tesia da, XX. mendeko eleberrigintzan egiantz eza nagusi dela. Nolabait, idazleak ez duela azaltzen kontakizunean errealitatearen osotasuna. Eta zein da falta den atala? Politika.

Esan behar dut, badagoela zintzotasun bat egilearen aldetik eta da, ez duela inondik inora ezkutatzen berak bere barruan daramana. Agian irakurleak pentsatuko du liburu hau irakurtzerakoan, bertan agertzen diren ideiak XX. mendekoak direla, zaharkituak, baina ikusita gure zibilizazioan ematen ari diren prozesuengatik, zer pentsatua badago, “ez baitut uste beste mundu bat posible denik, baizik eta mundu hau bizigarriagoa izango litzatekeela beste sistema ekonomiko bat izango balu”. Gopeguik proposatzen duena da idazleak mugitu behar duela, jada sistemari interesatzen zaion kontakizunetik kanpo, eleberrigintza nolabaiteko erresistentzia izan behar dela. Erresistentzia hori, tiro bat da kontzertuaren erdian, Stendhalen hitzek dioten bezala.

Liburuak Eider Rodriguezen hitzaurre bat dakar; beste proposamen bat.