kritiken hemeroteka

8.350 kritika

« | »

Zer barkaturik ez / Alberto Ladron Arana / Elkar, 2011

Fikzio-hitzarmenak Beñat Sarasola / Berria, 2011-07-03

Zer barkaturik ez Alberto Ladron Aranaren seigarren nobela dugu. Itzalaren baitan-ekin Irun Hiria saria eskuratuta hasi zuen iruindarrak bere ibilbide literarioa. Bigarrenarekin, Xake Mate-rekin, oihartzun nabarmena erdietsi eta harrezkero idatzitako nobelen bidez gure arteko genero-literaturako autore oparoenetakoa bihurtu da, bereziki, suspense edo intrigazko nobelen autore nabarmenetakoa. Azkeneko hau, aurrekoa —Ahaztuen mendekua— bezala, Ateko Banda sailean argitaratutakoa, ez da salbuespen, literatura genero horretan kokatutako nobela baita bete-betean.

Mikel Izu depresioagatik bajan dagoen zorigaitzez beteriko gizona dugu, mundu garaikideko kalamitate antiheroiko horietako bat. Aspaldi da Julen izeneko bere anaiarekin harremana galdu duela baina ezustean harekin zerikusia duen katramila batean nahasten da. Horrela da abiatzen nobela honetako istorioa. Egiatan, bi hari nagusiz osatzen da. Aipatutako Julenen afera dugu alde batetik, nobelaren erdigunea dena; bestetik, bat-batean agertzen den Lucia andaluziarrarena —eta haren aitonaren istorioa—, zeina lehenengoarekin txirikordatzen baita hasiera-hasieratik. Irakurleak, hala, bi istorio horiek mahaigaineratzen dituzten galderek akuilatuta egingo du orrialdeetan aurrera, Julenen nondik norakoak eta Luciaren aitonarenak ebatzi nahian.

Liburu luze samarra dela esan badezakegu ere, gertakariak abiada bizian kontatzen dira, eta handiak dira istorioak ematen dituen jirabirak. Horrekin loturik, dialogoa Ladron Aranak erruz erabiltzen duen baliabidea da, eta bizitasun hori areagotzen laguntzen du. Horretaz gain, nagusiki Mikel protagonistaren ahotik etorritako umore ateraldiek halako ukitu graziaduna ematen diote kontakizunari. Horrengatik guztiarengatik, eta intrigaren neurriaren taxuzko erabilerarengatik, irakurle askorentzat erakargarria izan daitekeen nobela dugu Zer barkaturik ez. Alabaina, niri ez zait hain erakargarria egin, tamalez.

Sarritan aipatu izan da nobelen irakurketa fikzioko hitzarmen baten menpe egon ohi dela; alegia, irakurleak soilik nobelak proposatzen dituen mundu eta modu narratiboak bere eginez gero egin ahalko duela kontaketan aurrera. Bada, inpresioa dut hitzarmen horrek huts egin, eta ezin izan diodala nobelaren amuari ongi heldu. Izan ere, hasteko, liburuko pasarte ugari sinesgarritasun handirik gabekoak begitandu zaizkit, eta, zenbaitetan, istorioa ustekabekoz ustekabeko eraikitzen dela iruditu zait. Halaber, gertakariei buruzko argibide sobera ematen direla, elkarrizketa luze eta astunegietan txertaturik maiz. Pertsonaia gehienak ere ongi ondu gabekoak eta estereotipatuak dira. Mikelen lagun Patxi izan daiteke horietako bat, baina batez ere emakumezkoak —Lucia eta Esmeralda—, zeinak nobela bateko pertsonaia biziak bainoago Las Mama Chicho-etako kide baitirudite. II. Mundu Gerran Euskal Herrian kokatutako istorio bat azaltzen zaigu —Luciaren aitonaren istorioa— orobat, baina pasarte horrek ez du laguntzen ez historiaren zirrikituetan sartzen ezta haren irakurketa kritiko bat egiten ere.

Ramon Saizarbitoriak Euskadi Irratian emandako elkarrizketa batean esan berri du literatura —ingelesen literary fiction— eta genero-literatura bereiztearen aldekoa dela. Neroni ere iritzi berekoa naiz. Garbi dago, besteak beste, bi literatura molde hauetako fikzio-hitzarmenak arras ezberdinak direla. Hartara, bereizketak ongi eginda, ni bezalako kritikari ipurterreak kalakan ibiltzeari utziko genioke. Arazoa, ezbairik gabe, nirea ere badelako, ez dagokidan lekuan muturra sartzeagatik.

Azken kritikak

Sorginak, emaginak eta erizainak
Barbara Ehrenreich / Deirdre English

Ainhoa Aldazabal Gallastegui

Ez naiz ondo akordatzen
Karlos Linazasoro

Mikel Asurmendi

Gerezi-denbora
Montserrat Roig

Amaia Alvarez Uria

Presbiziak lagundu omen digu
Edu Zelaieta

Mikel Asurmendi

Itsaso amniotikoa
Oihane Jaka

Aitor Francos

Itzulpena-Traducción
Angel Erro

Jon Jimenez

Itzulpena-Traducción
Angel Erro

Asier Urkiza

Maitasuna eta dirua, sexua eta heriotza
Mckenzie Wark

Nagore Fernandez

Fiesta: Eguzkia jaikitzen da
Ernest Hemingway

Aritz Galarraga

Biharraren hegietan
Maddi Sarasua Laskarai

Maddi Galdos Areta

Gaueko azken expressoa
Eneko Aizpurua

Aiora Sampedro

Aingeruak eta neskameak
June Fernandez

Ibon Egaña

...eta gauetik, euria
Fertxu Izquierdo

Nagore Fernandez

Nekropolia
Boris Pahor

Asier Urkiza

Artxiboa

2024(e)ko uztaila

2024(e)ko ekaina

2024(e)ko maiatza

2024(e)ko apirila

2024(e)ko martxoa

2024(e)ko otsaila

2024(e)ko urtarrila

2023(e)ko abendua

2023(e)ko azaroa

2023(e)ko urria

2023(e)ko iraila

2023(e)ko abuztua

Hedabideak