susa | literatur emailuak | literaturaren zubitegia | euskarari ekarriak | armiarma | klasikoak | aldizkarien gordailua | basquepoetry | ipuina.eus | ganbila.eus

« Txikia handi | Mozorrorik gabe »

Ahaztuen mendekua / Alberto Ladron Arana / Elkar, 2009

Ahaztuen mendekua E.B. / Aizu!, 2010-03

Irati basoan zehar egindako ibilaldian sekulako haserrealdia izan dute Anak eta Oskarrek. Bikotea osatzen zuten orain arte, baina Anak jakin du Oskar beste batekin ere badabilela, eta larrutik ordaindu beharko duela diotso mutil-lagunari. Liskarraren ondotik bereizi egiten dira mendian: Oskar autoa utzia duten lekura itzultzen da; Ana, berriz, ez da inondik ere agertzen.

Horixe da Alberto Ladron Aranaren eleberri berriaren abiapuntua. Hortik aurrera, hainbat gai ukitzen dituen nobela poliziakoan zehar eramaten gaitu idazleak, korapiloa askatu dela sumatzen dugun arte. Hala ere, ezustekoa (ala ez) hartuko du irakurleak azken kapituluan. Bikote harremanak, harreman heterosexual, bisexual eta homosexualak, lan harremanak, arrakasta eta porrota, sentimenduen mundua… Esan bezala, hainbat gai ukitzen ditu eta, barnean, Ladron Aranaren nobeletan ohi bezala, gerra kontuak, Espainiako 1936ko Gerra Zibila hain zuzen ere, kasu honetan.

Detektibe lanak gustuko baditu, laster sartuko da irakurlea Oskar eta Xabierren larruan, azkeneraino tentsioa mantentzen duen liburuan zeharreko bidaian laguntzeagatik, horixe baita Alberto Ladronek eleberri honekin lortu duena: irakurlea ere laguntzaile izatea nahi du Oskarren bizitza goitik behera aldatuko duen gertaeraren irtenbidean. Ondorioz, gustura irakurtzeko suspense nobela da hau.