« (Afrikako) lur joriko sorkuntza biluzia | Esnatzean »

Habitat / Katixa Agirre / Elkar, 2009

Bizitoki Felipe Juaristi / El Diario Vasco, 2009-04-10

Etxea, gure garai honetan, bizitzaren ardatz eta oinarri bilakatua zaigu. Bera da gure eguneroko jardunaldiaren abiapuntu; bera, gure helmuga eta aterpe. Etxean pasatzen ditugu ordurik gehienak. Etxetik kanpokoak deserrikoak dira ia. Baina gauza bat da etxea gozatzea, eta bestea etxea bizitzea. Ezberdinak dira, eta uste dut ezberdintasun hori ederki ageri dela Katixa Agirreren ipuin liburu honetan. Sei dira guztira: “Pijama festa”, “Guy Fawkes-en traizioa”, “Jaun eta jabe”, “Bere loa arina da”. “Hosting” eta “Feng Shui-aren errua”.

Gauza bat da etxea, eta bestea bizitokia. Liburuko pertsonaiek etxerik badute, hala moduzkoa batzuetan, baina benetako bizitokirik ez. Bizitzak ihes egiten baitie errealitatearen eta desiraren artean zabaldutako zirrikitutik. Zenbat eta handiagoa izan zirrikitua, orduan eta nahasiago bizitzari buruz duten ikuspegia. Nahasmendua dela esango nuke mundu modernoaren ezaugarririk behienena. Eta nahasmenduan bizi dira liburu honetako pertsonaiak. Bizitza eta bere errutinak nahasgarriak eta tronpagarriak dira; indar bateko zein bestekoek pertsonaiak batera eta bestera eramaten dituzte; ezin dute ongi kokatu beren buruak, bizi diren ingurumenean, ez baita erosoa. Pertsonaiek, hala ere, kontraesan guztien anean badabiltzan arren, aurrera jotzen dute, jakinik zerbait utzi dutela atzean. Erabakiak hartu beharra dago, eta erabaki hartzea erdibigarria da, beti geratzen baita ondo egin ote den zalantza. Ipuinak ongi eramanda daude, Erritmoa ez da bizia, pasatua baizik. Denbora ere ez da presazkoa, lasaia baizik, kamara motelaz filmatuta bezala.