Goizalbaren argitan / Pello Otxoteko / Erein, 2007

Goizalbaren argitan Goizalde Landabaso / Radio Euskadi, 2007-10-28

Maitasuna izan da eta da istorio guztietako ardatza. Are gehiago, literaturan edota zineman ematen diren istorio denak maitasunaren gainean aritzen dira. maitasunak aurpegi asko dituelako. Hamaika guztira. Ez dakit Pello Otxotekoren poema liburu honetan izan litezkeen maitasun denak ote dauden, baina asko badaudela bai.

“Zurekin adberbio guztiak iraganean ahantzita utzi nituen. Zurekin, gozotasun guztiak Samintasunaren orekan irentsi nituen. Zurekin, negar-zotin guztiak Eguneroko diosal bihurtu nituen”.

Badira zenbait olerki maitasunez beterikoak, hau da, aurpegi ezberdinak agertzen dituenekoak. Hasi zoriontsu hasten dira, erromantikotasunaren bidetik, eta gero, aldrebestu egiten da.

“Maitasuna Eguneroko elkarbizitzaren zirrikituetatik Igarotzen den arnasa artean aurki dezakegu. Maitasuna aurki daiteke Baina nekez, abiatu ezean”.

Batzuetan hoztasuna nagusitu dela begitandu zait, distantzia ikaragarria aurkitu dut idazle eta idatziaren artean. Seriotasuna gailentzen da, eta ez dakit zelan deskribatu baina suminduratik idatzia dirudi.

Argi eta ozen esan daiteke maitasunari eskainitako liburua dela, maitasunaz diharduela eta maitasunak eramaten zaituela. Baina inork ez dezala pentsatu olerkari erromantikoek amodioari kantatzen zioten zantzurik aurkituko duenik, horrelakoak oso gutxi izango direlako.