Ipuin barreka / Felix Bilbao / Euskaltzaindia, 1959

Ipuin-barreka Kepa Enbeita / Jakin, 1959

Ona liburu barri bat. Ipuin txorta bat dogu. 1954’garren urtean Euskaltzaindiak saritutako ipuin-txorta. Gure Aita Felix gaztearen luma bizkorretik urten daben 54 ipuin eder, barre osasungarria ta alaitasun sanoa sorrarazteko aproposak. Bere euskera, bizkaiera, erri-errikoa dogu, errez-erreza. Ba-dauka sua ta gatza. Bizkaierak berez ei dauko, danak dinoenez, grazia berezi bat ipuinetarako. Izan be Kirikiño aundiaren lana dauko gure euskerak, eta oneri zor deutso nunbait bere fama au.

Ipuin oneek irakurritakoan auxe esan eban Aingeru Irigaray euskaltzain jaunak: — Zu, ta ipuin auek egin dituena praillea dala diozu? — Bai, jauna. — Gezurra dirudi praille batek orrenbesterañoko gatza ta grazia eukitea…

Zer uste eban ba Irigaray jaunak? Prailleak gatzbakoak dirala? Aita Felix ez beintzat. Mutilla agiri yaku bera gatz-kontuan. Benetako euskaldun osoaren berbeteak zelako giarra ta mami gizena daukon jakiteko, liburu gitxi topauko dozu au bailio egokiagorik. Beraz, barre egitea, ta barre egitea euskeraz, ba-ditu balio bi, nere ustez, liburu goxo onek.

54 ipui goxo, barregarri… gure mundu onen damoskuzan nekeak arintzeko, bizitza alaitzeko, berebizikoak.

Ia, ba, euskaldunak, eta batez be bizkaitarrak, abegi ona egiten deutsazuen. Eta zuri Aita Felix: zure liburu au eztaiteia azkenengoa izan. Zure luma bizkor ori eztagizula ugerraz beteten itxi. Azken agurrean diñozun lez, izan zaiguzala laister zure irakurleekin barriro.