« Ezkutukoak desestaliz | Azalaren oroimena »

Hautsia natza / Juan Luis Zabala / Euskaltzaindia-BBK, 2000

Poema bat, galdera bat Javier Rojo / Ipar Atea, 2001

Juan Luis Zabala oso ezaguna da narratibaren arloan. Hautsia natza deitzen den liburu honekin (1999. urtean Felipe Arrese Beitia sarian irabazle gertatu zena) beste urrats bat eman nahi izan du idaztearen lanbidean eta olerkiaren bideak ere urratu nahi izan ditu. Dena dela, liburu hau poesia-munduan egiten duen lehenengo saioa bada ere, ezin esan daiteke hasi berri baten poesia dirudienik, heldua eta landua da-eta. Bere poemetan nagusi den giroa ezkorra da, mundu ilun bat, erasotzaile eta arrotza, islatzen duelarik. Bizitza bera borroka balitz bezala aurkezten digu poesia honek, baina borroka horretan aritzea ezinbestekoa den arren, aldez aurretik jakitun gaude ez dagoela irabazterik. Egoera honetan, poesiak alde batera utzi du ohiko lirikotasuna, honek zentzurik ez baitauka idazleak aurkezten digun mundu horretan, eta existentziaz egiten den galderaren itxura hartzen du. Erantzunik, ordea, ezin dugu bertan aurkitu.