« Melodramaren ezaugarriak | Dardara hori »

Eremu karroinduak / Luis Berrizbeitia / Elkar, 1992

Karruaren eremüetarik… Itxaro Borda / Argia, 1993-04-18

Poesiak geroago lekü gütiago düala üdüri lüke, gure literatür mündüaren panoraman. Halarik ere, argitaletxeek, noizean behin, dugün hitz eta espazio zuri gosea asetzeko xedeareki, ausartzen dira olerki bildüma zonbaiten plazaratzerat. Poeta gazteen artean, herots handirik gabe, bere bidea zülatzen ari da Luis Berrizbeitia durangarra. Lehen libürüa 1987an ezagützerat eman züan Pamielan, eta “Zoperna generala” haren haizeek, bazterrak harridüraz freskatu zütükean. Aldi honetan “Eremu karroinduak” aipatzen deizkü ildo bardinetik.

Galtoa zera lizate: ea poesia denez bakartarzünaren eta egüneroko bortxaiñien papereratzako moldea? Luis Berrizbeitiak pürü hala uste dü, “poesiaren erresuman sartu dira etsaiak” diolarik. hürrüntxagoñi paregabea den “Ezezkorraren Kredoan” jarraitzez: “Sinesten dut dohakabeak garela/eta gainerako guztia/ digresioa dela”. Jüsto poesia ditakela debaldezko “disgresio” sail hortarik ezkapitzeko tresna erakasten deikü olerkariak, esperantxa hütsen tatareki gerizatzeko estakürürik ez dela erantsiz.

“Zoperna Generala” bilduman bezala, “Eremu karroinduak” hontan poetaren mintzajea da agertzekoa: iparraldeko “Kutsua” nabaritüko deioe frankok; gük ordea estimatzen dügü “batüa”ren aberasteko manera hori, Herrien Arteko Alkargoaren seinale. Xiberotarrezko poema bat ere (ejer… ejerrena heltübada!) kausitzen ahal dügü delako karrüaren eremüetan. Hizküntzaren klasizismoak orano terribleago egiten dütü egüneroko bortxaiñien azalpenak.

“Baina jagoitik poemak debeku dira” dio. Hotzak ez gütü balinba eramanen…