susa | literaturaren zubitegia | literatur emailuak | armiarma | klasikoak | aldizkarien gordailua | basquepoetry | euskarari ekarriak

« Kafea hartzea Iruñean: ongi moldaturiko kontakizuna | Bianako Printzea, kondaira madarikatua »

Joxemi / Pablo Sastre / Susa, 1986

Joxemi Mikel Mendizabal / Argia, 1987-01-25

Atseginak Susa aldizkariak atera berri dituen bi nobelak. Lehenengoan, Joxemi, buruan dituen zenbait helburuengatik, dena baztertzea erabakitzen duen gazte bat dugu. Bere ideala, gure herrian zapalkuntza eta inperialismoa borrokatzea da; Euskal Herriko independientzia lortu eta munduko beste herri zapalduekin solidarioa izan dadila. Honela, Joxemi eta Luis bere lagun mina, Euskadin urte pila daramazkien gailego bat, hego Ameriketara joatea erabakitzen dute, pixkana-pixkana bere estratejia armatua aurrera eramateko. Autoreak, protagonistaren bidez, munduko herri zanpatu ezberdinak erakusten dizkigu, hego Amerika, Vietnam… bertako arazo politiko-sozialak azalduz. Herrien pobrezia, gizarte kapitalista krudelak, hizkuntza eta kultura zapalkuntzak, e.a.

Liburu hau politika nobela izatez aparte, Sastrek ez ditu abentura alde batera utzi dena gora-beheraz beteta agertzen bait zaigu. Idazkeraren tratamenduan, lexiko mailan gaztelerara joateko duen tendentzia ikaragarria da; eta hau ez da hitz tekniko edo modernotan gertatzen, baizik eta gure hizkuntzako jatorrizko euskal hitz eta espresio pila aipatzean. Gure hizkuntzak dituen hitz asko ez ditu kontuan hartzen Sastrek, nobela hontan behintzat. Dena dela ezaugarri hau baztertuz, ez dago non aspertzerik bere azken nobela hontan.