Zoo ilogikoa / Luigi Anselmi / Pamiela, 1985

Zoo ilogikoa Iñaki Camino / Argia, 1985-12-22

Ez dakigu izen xelebre horren atzetik zein idazle ezkutatzen den, baina zinez esaten dizuegu oso poeta ona dela. Zergatik den ona? Ez da beti erraz izaten hau argitzen, baina oraingoan xamurra izanen zait. Poesia, gauza traszendentalak esateko balio duen gauza dugu, baina baita gauza oso ederrak eta galanki josiak esateko ere, eta hain zuzen ere, hori da Luigi Anselmi delako honek egin duena. Paradoja eder askoren artean, naturaren munduaren ikuskera oker eta berezia ematen digu. Animaliak, haizea, negua, bedatsa, larreak, itsas-neskak e.a, ditugu protagonista bere poesian nagusiki. Ez gaitu inondik ere aspertzen bere poesiak, edale gautiarra, gauaren olatuak aurkitzen diren tokian aurkitzen baita, izarrak hiltzera doazen hondartzan, eskuez urari alferrikan eutsiz: bideak urdinak dira, eta mezulariak uso hila dakar eskuan, desioaren sugeak emeki maitaleen gorputzetan irristatzen diren bitartean. Kale grisaren bestaldean berriz, maitea dago, hasperenak astindu gortinen atzean.

Zinez diotsuet poema hauek merezi dutela, eta norbait maite duenak, egin diezaiokeen erregalirik ederrena liburu hauxe duzuela.