susa | literatur emailuak | literaturaren zubitegia | euskarari ekarriak | armiarma | klasikoak | aldizkarien gordailua | basquepoetry | ipuina.eus | ganbila.eus

« Euskal literatura eta gizartea edo Sarrionaindia-ren “Ni ez naiz hemengoa” | Longa kapa beltza »

Hitz antzuen azokan / Gema Lasarte / Susa, 1985

Hitz antzuen azokan Iñaki Camino / Argia, 1985-06-02

54 bat poema dira Gemak liburuan agerrerazi dituenak.

Aurreneko momentutik igertzen diogu bere asmoari; erabiliaren erabiliaz eta gezurraren gezur konbentzional faltsuaz indar adierazgarriz hustu eta antzutasunez bete diren hitzak erauzi egin nahi ditu bere baratzetik. Lan hau egiterakoan kritikaz baliatuko da maiz. Kritika kutsuko poemetan aurkitu ditugu beren gehiegizko zuzentasuna dela medio, poema antza gutxi dutenak, zuzenegi eta errazegi litezkeenak. Azaldu beharrekoa bidenabar, Gemaren poesia ez dela inondik ere iradokitzen duena, gauzak argi eta garbi uzten dituena baino, eta hara bere dohaietan bat: ez da inola ere poesia zaila, hau da, ez duela sakoneko bigarren irakurketa edo interpretaziorako beharrik. Poesia zehatz eta zuzen hau idazten duena irudimen handiko, oso handiko esango nuke nik, norbait dela ez dago ukatzerik, asmatzen dituen marko poetikoak benetan ezin pentsatuzkoak baitira, topikoetatik urrun, aberatsak eta ederrak. Ez dago inolako beldurrik inor Gemaren poesiaz gozatu gabe geratzeko, errekurtso nabarmenekoa baitugu bera, hitz batez esateko, olerkaria dugu liburuaren egilea, benetakoa.

Ez da formalistegia, gauzak beren zuzenean adieraztea du gustokoen. Nik, egia esateko, moralaz, errepresioaz eta antzeko erreibindikazioez diharduten poemak aurkitu ditut balio handirik gabeak, beste guztiak, eta gehienak dira, oso poetikoak eta irudimen aldetik aberatsak topatu ditut. Pena merezi duen liburua dugu.