susa | literaturaren zubitegia | literatur emailuak | armiarma | klasikoak | aldizkarien gordailua | basquepoetry | euskarari ekarriak

« Hitz antzuen azokan | “Ni ez naiz hemengoa” »

Longa kapa beltza / Joxean Agirre / Haranburu editor, 1984

Longa kapa beltza Iñaki Camino / Argia, 1985-06-16

Lau ipuin argitaratu ditu Joxean Agirrek, honelako zerbait egiten duen aurreneko aldia dela aitortuz. Aski adierazgarri da idazle batek bere lehen literatur liburuan halako zerbait egitea. Aitortzen duena hauxe da: ipuin hauek ariketa gisa eginak dituela, hastapenetako lehen zirriborroak. Eta are gehiago, ipuin bakoitzak aitajaun zein duen ere aitortzen du, honela, “Longa kapa beltza” deritzanak, ba omen du zorrik Joycerekin, “Pentsatzen dut” izenekoak M. Frischekin, eta “Zure ezpainen o obalatua i izkutua” eta “Azken finean ez dakit”ek Saizarbitoriarekin.

Ipuinak antzeko xamarrak dira elkarren artean, egituraren aldetik nahiz gaiarenetik. Denetan ageri dira bizitzako une garrantzitsu zenbaitek utzitako aztarnak, oroitzapenaren bidez aideraziak, momentu horretako kontaeran tartekatuak, gertaerak erabat nahasiz, kontaerako pasarte guztiei garrantzi bera emanez, erritmo lasaian gogorapenak, frakasuak, tabernazuloetako pasadizuak, goizeroko alu ferekatzeak eta gazte denborako haurren sexu esperientziak aditzera emanez. Maitasunezko harremanak ditugu nagusi, beren ongaitzak aurrean direla. Esatekoa da gainera Agirreren hizkera adierazgarria eta indar handia daukana dela.