susa | literaturaren zubitegia | literatur emailuak | armiarma | klasikoak | aldizkarien gordailua | basquepoetry | euskarari ekarriak

« Emakumeak idazle (antologia eta ohar zenbait) | Koldo Izagirre, idazkera literario eredu bila »

E pericoloso sporgersi / Pello Lizarralde / Lur, 1984

E pericoloso sporgersi Iñaki Kamino / Argia, 1984-12-30

Joxe Azkue euskal enpresako langile kualifikatua dugu, negozio kontutan trebea, enpresako teknika kontutan aleman batzurekin tratuak zerratzera Alemania bertara doana.

Bere enpresak ematen dio txangoa hegazkinez egiteko lain, baina beldurraren eraginez trenez egitea deliberatzen du, eta bidai luze bezain nekosoa gertatzen zaio. Alemanian dela, negozio kontutako bileretan eta bazkaritan ematen du denbora egunero plan berbera daukalarik. Gauez ateratzea, dibertitzea eta guzti horiek ez dira bere egitekoak.

Baina, azken egunean, etxera itzultzeko garaia heltzen denean, semealabentzako jostailu modernoak eta Nina Hagen-en diskoa erosi ta gero, Alemaniako lantegiko sekretariarekin akordatzen da eta hots egiten dio.

Nobela honen ezauzarri nagusia moteltasuna da, pena merezi duten gauzak oso azkenean baitira gertatzen, eta bitartean Joxe Azkueren bidaiaren zertzelada motz batzu demazkigu idazleak, akzioa bukaerarako utziz. Idazleak narratu egiten du gertaera behinena iritsi bitartean, ia elaberri guztia narratze eta deskribatze saioa dugu, tren batean edozein ordutan gertatzen diren kasuek dute garrantzia, edota estazio handia gizon bakar batek pentsa eta egin ditzakeen gauzek, nobelaren giltza den akaberako gertakaria ez da beraz kantidadez behintzat garrantzi gehiena duena.