susa | literaturaren zubitegia | literatur emailuak | armiarma | klasikoak | aldizkarien gordailua | basquepoetry | euskarari ekarriak

« Salbatore Mitxelenaren “Idazlan Guztiak II” | E pericoloso sporgersi »

Emakumeak idazle / Itxaro Borda / Txertoa, 1984

Emakumeak idazle (antologia eta ohar zenbait) Iñaki Kamino / Argia, 1984-12-23

Bat baino gehiago egongo da liburu honen irakur minez, hain baita titulua idarokigarri. Itxaroren lana bi ildotatik ibili da. Batetik, euskal literaturaren “literatura” argitaratu duten emakumeak zein diren ikusi (denak XX, mendekoak gainera) eta argitaratu dutenaren puxketa bat ondoan ipini, idazlearen datu biografiko zenbait emanez. Idazle horren lanari buruz hainbat bazterretan zer idatzi edo kritikatu den ere badakar aldi batzutan.

Bestalde, Itxarok berak idatzitako lerro batzu datoz liburuaren hasieran, teoria piska bat egin nahiez edo. Bertan emakumeak euskal gizartean eta emakumeak idazle bezala aztertzen ditu. Mitologia, feminismoa, soziologia, barneko sikologiak bere izaerarengan duen eragina, euskara, emakume idazleen tipologia, argitaraketa, zer idazten duten, mamia nondik nora doan eta hauen gizamaila. Guzti hau litzateke liburuaren alderik interesgarriena, hemen baitaude interesik handiena duten pasarteak, Itxaroren teoriak e.a. Baina tamalez guzti hau oso oso labur adierazten da, ideia batzu botatzen dira, baina ez dira sakontzen, idazleari aski iruditu zaio, baina irakurleak ezer gehiago behar du. Bada hainbat esaldi eni oso interesezko iruditu zaidana, baina hor bukatzen du Itxarok, inondik ere. Nerekiko, argitaratze ausartegia izan da, sarreraren aldetik bederen. “Emakumeak idazle” saila luzeago eta sakonago esplikatu balitz, ideia arras aberatsak geureganatuko genituen horko esaldiei interpretazioa bilatu nahi diegun askok eta askok.