susa | literaturaren zubitegia | literatur emailuak | armiarma | klasikoak | aldizkarien gordailua | basquepoetry | euskarari ekarriak

« Historia destilatuak | Nafarroako artizarra »

Klick ssssh klack / Iñigo Barandiaran / Susa, 1984

Klick ssssh klack Iñaki Kamino / Argia, 1984-12-09

35 olerki biltzen ditu Barandiaranen liburuska honek. Olerkia poliki irakurri, eta interpretatzen gostu duen edonorentzat oso liburu atsegina gerta liteke. Lerro oso motzen zerrenda luzeek osatzen dute askotan ulermen ez errazeko olerki hauek. Errealitatea osoki baztertzen ez duen arren, badu idazleak irrealismoaren bide poetikoetatik abiatzeko, maitasunezkoak izaten baitira segurik errealitate pixka bat dutenak.

Irudia izugarri zaintzen duen olerkaria dugu Barandiaran, bertan oinarritzen baita ia nagusiki bere olerkia, imajina ezinezko irudi eder bezain harrigarriak eratzen ditu elkarrekin zerikusirik ez duten hitzak gateatzean irakurketa plazerretik oso hurbil utziz.

Harriduraren bide beretik lihoazke agian zuketa eta hiketa nahasteak, espero gabeko bukaerak eta idazlearen hainbat eta hainbat baliabide. Irudimen oso aberatsekoa dugu Barandiaran. Iritzi beti subjetibo honi oso goxoa eta atsegina gertatu zaion olerkia.