« Euskaldun zertarako? | Bizitzen ahalegindu »

Pasionaria / Alberto Barandiaran / Elkarlanean, 1998

Iraultzarekiko pasioaren haria Mikel Aldalur / Euskaldunon Egunkaria, 1998-04-18

Inor gutxik jarriko du zalantzan Dolores Ibarruri, Gallartan jaiotako emakume handia, Euskal Herritik kanpora ere mende honetako emakume garrantzitsuenetako bat izan dela. Elkarlanean argitaletxekoek behintzat ez dute ezbairik eta, beraz, ederki asmatu dute lehendik ere oro har pertsonaia interesgarriekin osatzen ari den Biografiak sailera bizkaitarra ekartzearekin.

Ibarruriren biografia idazteko ardura Alberto Barandiaran kazetariak hartu du. Hau da altsasuarraren lehen liburua. Ibarruriri buruz genizkienak Barandiaranen lumak osatu dizkigu liburu labur baina interesgarri honetan. Jakin dugu, esaterako, Ibarruri meatzari-sendi batean jaio zela eta zapalketa eta esplotazio soziala gaztegaztetatik ezagutu zituela. Ibarrurik, beste askok bezala, komunismoan aurkitu zuen injustizia horiek konpontzeko bidea. Barandiaranek, ordea, liburu honetan ez du bildu Pasionariaren ibilbide politikoa bakarrik. Pertsona gisa hurbildu zaio Barandiaran politikari bizkaitarrari, eta hurbilketa hori gertatzen da liburua xarmangarri egiten duten arrazoietako bat. Ama izatea, gizonekiko harremanak eta erbestealdi luzeko herrimina, esaterako, ederki islatuak gelditzen dira liburuan, eta irakurleari biografiatuarekiko adiskidetasun konplizea sortzen diote.

Argitaratzaileek liburua hedatzeko bidalitako oharretan adierazi bezala, “pasioz beteriko bizitza izan nuen Ibarrurik, eta pasio beraz irakurtzen da Alberto Barandiaranek idatzitako biografia hau”. Argitaratzaileen hitzetan beharbada ez du sinesgarritasunik horrelako baieztapenak. Guri, ordea, sinetsiko diguzuelakoan gaude. Egia baita liburu ederra dela Pasionariaren biografia hau. Dolores Ibarruriren ametsak bezain ederra.