susa | literatur emailuak | literaturaren zubitegia | euskarari ekarriak | armiarma | klasikoak | aldizkarien gordailua | basquepoetry | ipuina.eus | ganbila.eus

« Iraultzarekiko pasioaren haria | Kronika bitxia »

Ahotsik behartu gabe / Bitoriano Gandiaga / Erein, 1997

Bizitzen ahalegindu Javier Rojo / El Correo, 1998-04-22

“Ni egunerokotasunaren barruan bizi nauk eta esparru honen barrukoa toreatzearekin nahikoa zeukaat ia beti” (84. orr.). Bitoriano Gandiagaren esaldi honek defini dezake oso ondo zein den bere eginkizun poetikoa. Ahotsik behartu gabe antologia berezia da. Alde batetik, 1963.etik 1989.era bitarteko zenbait poema biltzen dituen liburu bat; bestetik idazleak berak poema horietako batzuk errezitatzen dituen disko konpaktua. Idazleak ez ditu hemengo poemak bere liburu ezagunenetatik hartu; izan ere, argitarapen oso mugatuetan agertutakoak edo inoiz argitaratu gabeak dira poemok. Idazleak berak hitzaurrean esaten du lehengo poemak eta gerokoak konparatuz gero ez diruditela idazle berak eginak. Hasierakoetan naturalezaren goraipamena eta honek sortzen dion zirrara agertzen dira. Gerokoetan, bizitza arrunteko gertaera xumeak erabiltzeko joera erakutsiko du; edota, noizbait, gai politikoak ere bai. Teknika-estiloetan ere halako aldaketak antzeman ditzakegu. Metrika tradizionaletik eta estilo erretoriko batetik, metrikaren aniztasunera (bertso libreak barne) eta itxuraz behintzat prosaikoagoa den estilora lerratzen da bere poesia. Poeta honen ibilbidea ezagutu ahal izateko liburu hau benetan interesgarria dela pentsatzen dut.