susa | literaturaren zubitegia | literatur emailuak | armiarma | klasikoak | aldizkarien gordailua | basquepoetry | euskarari ekarriak

« Bizitzen ahalegindu | Gerraren ondorengoak »

Kilkirra eta roulottea / Joxemari Iturralde / Erein, 1997

Kronika bitxia Javier Rojo / El Correo, 1998-04-29

Joxemari Iturraldek eleberri handia, eta ez naiz luzaeraz ari, egiteko asmoa izan du, Kilkirra eta roulottea idaztean. Franco hil ondoko transizio garaiko kronika bitxia egin nahi izan du eta horretarako pertsonaia batzuek garai horiek nola bizi izan zituzten kontatzen digu. Pertsonaia nagusia eta narratzailea John Erdosain da, erdi estatubatuarra erdi euskalduna, Franco hil zenean Ondarruko institutoan irakasle egondakoa. Pertsonaia honek, bere egoera bereziak ematen dion talaia aprobetxatuz kontatzen dizkigu garai hartako gorabehera zenbait. Eleberria, batez ere lehenengo erdian, korapilatsu gerta daiteke, gertaerak eta oroitzapenak nahastuta pertsonaiak denboran aurrera eta atzera saltoka dabiltzalarik, kontakizun nagusian hainbat eta hainbat istorio txiki sartzen direlarik. Bigarren erdian, ordea, askoz linealagoa izanik, errezagoa izango zaio irakurleari kontakizunaren haria jarraitzea, bidezidorretan galdu gabe. Atal honetan azaltzen diren gauzetan oinarritzen da eleberriaren izenburua: pertsonaiak (kilkirra) bere roulotean egiten du inora gabeko txangoa Euskal Herrian zehar. Eleberri luzea da; beraz, nahi izanez gero errez aurki daizteke zenbait momentu ahul. Edonola ere, ondo merezi du jaso berri duen Kritika Saria.