kritiken hemeroteka

8.826 kritika

« | »

Suetena Belfasten / Imanol Murua Uria eta Humberto Unzueta / Susa, 1996

Belfasten eta Berastegin Luis Fernandez / Euskaldunon Egunkaria, 1996-06-29

Badituzte loturaren batzuk euskal abertzaleek eta Irlandako errepublikazaleek, eta horietako bat da katolikoak garela, liburu honetako egileetako batek onartu duen bezala. Lotura hauen ondorioz, peregrinazioan joaten da hainbat euskaldun Ipar Irlandara, eta horrelaxe betetzen dira Belfasteko kaleak euskaldunez abuztuan. Aurten ere joango dira mordo bat: batzuek Suetena Belfasten eramango dute besapean, eta gida ona izango zaielakoan nago, Belfast eta Irlanda ezagutzen ez ditudan arren. Liburu honek jaso ditu laudorio batzuk irten eta berehala. Ez da xumeena izan Deia-ko politika orrietan aipamena jasotzea. Hemen gaizki jarri beharko genuke akaso, oreka apur bat egiteko, baina ez dugu hala egingo. Txaloa merezi dute Unzuetak eta Muruak.

Kazetari liburu batek eragin dezakeen sentsaziorik onena inbidia da. Bizitakoen kronikak irakurlea liburuko une eta tokietan bertan egoteko irrikitan uzten duenean, asmatu egin du kronikagileak. Hala gertatzen da Suetena Belfasten irakurtzean. Abentura gosez utzi gaitu, inbidiatan.

Abentura diot, eta ez egileek dramatismo bereziz hornitu dutelako kontakizuna. Sueten garaia da, gogoratzen digute behin eta berriro, eta hortaz, ez omen du meriturik gerrarik gabeko gerra parajean ibiltzeak. Beren bizipenak kontatzean, Muruak eta Unzuetak umiltasun puntu batekin egiten dute, kasualitatez edo nahigabean ariko balira bezala. Protagonistak irlandarrak direla gogoratzen digute behin eta berriro, eta eurak turista gisa azaltzen zaizkigu kasik.

Eta turista despistatuaren ironiaz hornitu dute kontaera. Umorea dario liburuari hasieratik amaierara, eta umore fin horrek pasarte guztiak ukitzen ditu, baita dramatikoenak ere. Ondorioa, hemendik edo handik har daitekeen liburua da: pasarte politikoak (unionistei buruzkoak bereziki interesgarriak), gizarte bizitzaren kontuekin nahasten dira, eta batak bezain interesgarriak dira besteak. Doinu bera du liburuak hurling jokoa zer den esplikatzean, eta atentatuak jasan dituztenen testigantzak jasotzean. Interes doinu bera, esan nahi dut, eta hortaz, ez du asperraldirako aukerarik ematen. Bi kazetariok zein ederki banatu duten lana ikustea ere inbidia emateko modukoa da (beste kazetari baten ikuspuntutik, bederen).

Inbidiatan geratu gara, azkenik, Euskal Herriko gatazkari buruzko antzeko zerbait irakurtzeko. Aste honetan bertan, adibidez, ekintza etenaldi labur hau dela eta… Ez da inon argitaratuko benetako erreportaia interesgarririk, ez dugu irakurriko —seguru nago— Muruak eta Unzuetak Belfasten egindako kronika edo analisiaren parekorik. Ez EGUNKARIAn, ez beste edozein euskal mediotan. Suetena Berastegin idazteke dago.

Azken kritikak

Nola esaten zaio agur ama bati
Uxue Razkin

Peru Iparragirre

Mari-alderrai
Colette

Aritz Galarraga

Erreplika
Maialen Berasategi Catalan

Ibon Egaña

Hegal egiten
Eneko Bidegain

Mikel Asurmendi

Sorbatza
Markel Sanchez

Asier Urkiza

Dakigun hori
Garazi Arrula Ruiz

Nagore Fernandez

Ipuinak eta antzezlanak
Lourdes Iriondo

Amaia Alvarez Uria

Ezezagunak trenean... irakurtzen
Miren Billelabeitia

Paloma Rodriguez-Miñambres

Dakigun hori
Garazi Arrula Ruiz

Mikel Asurmendi

Narrugorrik
Ixiar Rozas

Peru Iparragirre

Lera
Castillo Suarez

Maialen Sobrino Lopez

Hezitopia
Nora Salbotx

Joxe Aldasoro

Atzerakarga
Fermin Etxegoien

Asier Urkiza

Manifestu filosofikoa
Agustin Arrieta Urtizberea

Aritz Pardina Herrero

Artxiboa

2026(e)ko azaroa

2026(e)ko urria

2026(e)ko iraila

2026(e)ko abuztua

2026(e)ko uztaila

2026(e)ko ekaina

2026(e)ko maiatza

2026(e)ko apirila

2026(e)ko martxoa

2026(e)ko otsaila

2026(e)ko urtarrila

2026(e)ko

Hedabideak