susa | literatur emailuak | literaturaren zubitegia | euskarari ekarriak | armiarma | klasikoak | aldizkarien gordailua | basquepoetry | ipuina.eus | ganbila.eus

« Mitika | Harriaren hitzak »

Laino artean zelatari / Felipe Juaristi / Alberdania, 1993

Berriro poesiaren badiara Edorta Jimenez / Euskaldunon Egunkaria, 1993-06-06

Felipe Juaristi poesiaren badiara etorri da berriro, zazpi bat urte bestelako literatur-uretan eman ondoren. Ekarri duen liburua, “Laino artean zelatari”, sortu berri dugun Alberdania argitaletxearen Poesia sailari hasiera emanez, gure portuetan aspaldion ikusten ari garen untzi berri bakan horietariko bat da. Eta baten batek poesiaren badiako urak bareak direla uste badu ere, esan beharko zaio barkuek sotoetan ekarri ohi dutena berori izaten dela asaldagarriena. Poetak arriskatu egin behar baitu bere kargamendua hautatzean. Zazpi urteren buruan barku edo liburu bat, ez al da ondo pentsatzeko modukoa?

Sotoetan lehergaiak dakartza liburu honek. Zein motatakoak diren zehatz-mehatz esatea zail egiten den arren, argi dago ohizko zenbait poesi kontzepturi gilan egiten diona tiro. Ez da, besterik gabe, alde formalei begira zenbakiak agertzen, direla tartekaturik eta osagarritzako ere. Liburu honetako 30 poemetako lerro guztietan —edo ahapaldietan, halakoen aurrean, baldin badaude begiak— irudi bana dago, gutxienez jota. Irudi andana, bada, egileak berak EGUNKARIA beronetan adierazi duenez, filosofiaren uretan eta (artxipielago modura eratzen direnak, nik uste).

Esan behar da, irudiak irudi, liburuari Felipe Juaristik bera titulotzako ezarri dionak ere ederki laguntzen duela, nik orain arte esandakoak baino hobeto agian, liburua zein itsasotik datorren uler dezagun, zeren hamargarren orrialdean baitio: “Laino artean zelatari / Bihotz deitu heroi triste hori”. Heroien artean gogokoenak, nik neuk, ez akaso Felipek ere, itsastarrak eta gladiadoreak. Halako baten liburua duzue hau. Bada, abstenitu bitez ohizko trobalari eta koblakarien zaleak. Liburu honek irakurle grinatsuak eskatzen ditu eta.