susa | literaturaren zubitegia | literatur emailuak | armiarma | klasikoak | aldizkarien gordailua | basquepoetry | euskarari ekarriak

« “Maria” amona asko dira | Ttu egin zuen »

Imajina ezazu Euskadi Sariak / Askoren artean / Central Hispano, 1993

Euskadi topiko eta sinplea Juan Luis Zabala / Euskaldunon Egunkaria, 1993-02-21

Sariketa literarioei buruzko polemikak isilduak direla dirudi aspaldi luzean. Dena dela, argi dago zer kritikaturik ez dela falta, gai hau aipatzen hasiz gero. Banketxe “hispaniar” batek antolatutako “Imajina Ezazu Euskadi” sari honetaz ari naizelarik, esan dezadan oso susmagarria iruditzen zaidala, alde guztietatik.

Zein diren alderdi horiek? Bada, batetik betikoak daude: etxe antolatzailearen publizitatea egitea artisten sustatzea baino garrantzizkoagoa dela nabarmenegi agertzen da; saritutako lanen argitalpena, berriz, oso itxia, hots, batere zabalkunde eta promoziorik gabe egina, eta zentzu handirik gabekoa gainera, arlo eta hizkuntza guztietako lan sarituak liburu bakar eta mordoilo samar batean ematen baitira argitara… Bestetik, “Imajina ezazu Euskadi — Imaginate Euskadi” izenari dagokionak daude, hots, sariketa honenak bereziki. Lehiaketari izenburu hori emanez, Euskadi delako horrekiko kezka bizi dutela “saldu” nahi digute antolatzaileek. Hala balitz, kezka hori benetakoa eta sinisgarria balitz, justifikatua legoke agian artistari bere askatasuna mugatu eta bene lanaren bidez, nola edo hala, Euskadi —edo Euskal Herria— imajinatzen saiatzeko eskatzea. Arte plastikoetan saritutako hainbat lan ikusita, ordea, Euskal Herriari —edo Euskadiri— buruzko ikuspegi topiko eta sinpleegia ez ote den hobesten ari iruditzen zait. Ideia polita izan daiteke “Euskadi imajinaraztearena” baina bidegabekeria askoren iturburu ez ote da lehiaketako sariak erabakitzeko irizpidetzat hori hartzea, lehiaketak oro har, bestela ere, nahikoa bidegabekeriaren iturburu direla kontuan hartuta?

Gaizki esanak barkatuko eta ongi esanak gogoan hartuko zaizkidalakoan.