« Heroi kolektibo baten oroitzapen eta gogoetak | Geure buruarentzako oparia »

Patuaren pasadizuak / Isak Dinesen (Juan Mari Mendizabal) / Elkar, 1992

Dinesenen bost bitxi Agustin Aranzabal / Euskaldunon Egunkaria, 1992-04-10

Karen Blixen edo Isak Dinesen idazle daniar ezagunaren “Skaebne Akekdoter” ipuin bilduma euskaratu eta aurkeztu du duela gutxi Juan Mari Mendizabalek, “Patuaren pasadizuak” izenburupean.

Gabriel Axel-en izen bereko filme ezagunaren oinarri den “Babetteren oturuntza” narrazioa da ipuin liburu mardul hau osatzen duten bost aleen arteko bat. Beste bat, Orson Wells zinegile ezagunaren “Istorio hilezkorra” filmearen oinarri izan zen berriz.

Izan ere, Isak Dinesenen kontaketek zinegileentzat oso erakargarriak izan dira beti. Eta ezin utzi aipatu gabe, behin honetaz hizketan hasiz gero, berak 1938an idatzitako “Out of Africa” nobelan oinarriturik Richard Attenboroughek zuzendu zuen “Memories of Africa” filme ezagun hura, hainbeste Oscar eta hain ospe handia bereganatu zuena.

Danieratik zuzen-zuzenean eta oso egoki itzuli dizkigu Juan Mari Mendizabalek Dinesenen ipuinok, jatorri daniarra duen bere emazte Pernilleren laguntzaz. Kontaketa guztion jatorrizko bertsioa ingelesez egina dela aipatzen digu Mendizabalek liburuari egindako sarreran, baina Dinesenen idazlanak “bere ama-hizkuntzara itzultzerakoan testuaren balio literarioa aberastu egiten dela” ere esaten digu.

“Inglesezko testua narratua izateko bazen ere (…) danierazkoari irakurmina asetzeko moduko aberastasun gaineratu bat somatu izan diot, eta horregatik hizkuntza aukera”, jarraitzen du Mendizabalek hitzaurrean.

Xehetasun horietaz aparte ere, interes handiko liburua, gusto handiz irakurtzeko modukoa, eta benetan gomendagarria.