susa | literatur emailuak | literaturaren zubitegia | euskarari ekarriak | armiarma | klasikoak | aldizkarien gordailua | basquepoetry | ipuina.eus | ganbila.eus

« Hamaika ikusteko jaioak gara | Zorionak »

Ezpataz hil / Koldo Biguri / Erein, 1995

Itxura faltsuak Javier Rojo / El Correo, 1996-03-07

Ezpataz hil izenpean argitaratu ditu Koldo Bigurik bere lehenengo istorioak, “Milabidai” bildumari dagokion bezala, ozta hirurogei orri dituen liburuxka batean. Baina liburuaren formatuak ez gaitu engainatu behar: nire ustez, bere txikitasunean benetan liburu interesgarria burutu baitu idazleak. Hiru istorio bildu dira bertan, bi euskaraz, hirugarrena gazteleraz. Hirurek gai historikoak dituzte, kontatzen direnak XVI. mendearen inguruan data daitezke-eta. Eta hiruretan joku berbera ematen da: errealitatetzat daukagunaren atzean izkutatzen den sekretua azaltzea. Lehenengoan, Italiako konbentu baten barruko bortxaketak eta hilketak azaltzen ditu Ama Priorak hil aurreko aitortzan, hainbat urtetan sekretuan gorde ondoren. Berdin egiten du, bigarrenean, Ameriketan gobernadore moduan bizi den iruzurtiak: heriotzaren ordua hurbil dagoela ikusita, bere bizitza faltsua argitzen saiatzen da. Erderaz idatzitakoaren kasua konplexuagoa da, eskuizkribu baten fikzioaren bidez, “itzulpen” oker baten atzean izkutatzen den istorio lazgarria iradoki baizik ez baita egiten. Eta hau guztia sintaxian idazle klasikoak gogora ekartzen dituen idazkera dotore eta atseginez irakurtzen den batean kontatua.